ஹைட்ரஜன் வாகனம்- மதிபாலன்

 தற்போது தயாரிப்பில் இருக்கும் ஹைட்ரஜன் வாகனங்கள் ஹைட்ரஜன் எரிபொருள் செல் (Hydrogen fuel cell) தொழில்நுட்பத்தைப் பயன்படுத்துகின்றன.

 ஹைட்ரஜன் வாயுவைப் பயன்படுத்தி மின்சாரம் தயாரிப்பதுதான் ஹைட்ரஜன் எரிபொருள் செல் தொழில்நுட்பம். இது எப்படி வேலை செய்கிறது என்பதை இப்போது பார்க்கலாம்.

எரிபொருள் செல்   வேலை செய்யும் விதம்

ஒரு எரிபொருள் செல்லில் இரண்டு முக்கிய பாகங்கள் இருக்கும்: அனோடு மற்றும் கேதோடு.

• அனோடு: இதில் ஹைட்ரஜன் வாயு செலுத்தப்படும்.

• கேதோடு: இதில் காற்றிலிருந்து ஆக்ஸிஜன் எடுத்துக்கொள்ளப்படும்.

      *எலக்ட்ரோலைட்: இந்த           இரண்டு பாகங்களுக்கும் இடையில் ஒரு சவ்வு( Polimer electrolyte membrane)இருக்கும். இந்த சவ்வு ஹைட்ரஜனைப் பிரித்து, அதிலிருந்து எலக்ட்ரான்களை எடுத்துக்கொள்ளும். 

இந்த எலக்ட்ரான்கள் ஒரு மின்சுற்று வழியாக சென்று மின்சாரத்தை உற்பத்தி செய்கின்றன. இதன் இறுதியில், ஹைட்ரஜன் மற்றும் ஆக்ஸிஜன் இணைந்து தண்ணீர் உருவாகிறது.

ஹைட்ரஜன் எரிபொருள் செல்லின் நன்மைகள்:

• சுத்தமான ஆற்றல்: இந்த முறையில் மின்சாரம் தயாரிக்கும்போது எந்தவித மாசுக்களும் வெளியாகாது.

• அதிக திறன்: பாரம்பரிய எரிபொருள் வாகனங்களை விட அதிக தூரம் செல்ல முடியும்.

• வேகமாக நிரப்பலாம்: பெட்ரோல் நிரப்புவது போலவே, ஹைட்ரஜன் எரிபொருள் செல் வாகனங்களையும் வேகமாக நிரப்பலாம்.

தற்போதைய சவால்கள்:

• ஹைட்ரஜன் நிரப்பு நிலையங்கள் குறைவு: இன்னும் ஹைட்ரஜன் நிரப்பு நிலையங்கள் போதுமான அளவு இல்லை.

• விலை அதிகம்: ஹைட்ரஜன் எரிபொருள் செல் வாகனங்களின் விலை இன்னும் அதிகமாகவே உள்ளது.

• ஹைட்ரஜன் தயாரிப்பு: பெரும்பாலான ஹைட்ரஜன் இன்னும் புதைபடிவ எரிபொருட்களிலிருந்து தயாரிக்கப்படுகிறது. அதைப் பயன்படுத்தி அதிக அளவு ஹைட்ரஜன் தயாரிப்பது கடினம்.

எதிர்காலம்:

பல கார் நிறுவனங்கள் ஹைட்ரஜன் எரிபொருள் செல் தொழில்நுட்பத்தில் அதிக கவனம் செலுத்தி வருகின்றன.

 எதிர்காலத்தில் இந்த தொழில்நுட்பம் மேலும் வளர்ச்சியடைந்து, விலை குறைந்து, ஹைட்ரஜன் நிரப்பு நிலையங்களின் எண்ணிக்கையும் அதிகரிக்கும் என்று எதிர்பார்க்கப்படுகிறது.

  

 

காதல் மேகம்- மதிபாலன்

 

பகலும் இரவும் அணைத்துக் கொள்ளும் இனிய மாலை. பசுமை கொஞ்சும் மரங்கள் சூழ்ந்த அழகுச் சோலை.

இரு இதயங்கள் இணைந்த  அஸ்வினும் அனுஷாவும் அருகருகே அமர்ந்திருந்தனர். கண்கள் கண்களைத் தேடி , மனங்கள் ஒன்றோடொன்று பேசிக்கொண்டிருந்தன.

மெல்ல மெல்ல, வானம் கறுத்து  மேகங்கள் பன்னீரை  தூவத் தொடங்கின. மழைத்துளிகள்,  அவர்கள் இருவரின் மீதும் வசீகரப் பூக்களாய் வந்து விழுந்தன.

 ஒவ்வொரு மழைத்துளியும்   , அவர்களின் காதலை வளர்த்தது. அனுஷாவின் விழிகள், மழைத்துளிகளில் மின்னின. அஸ்வினின்  இதயம், அந்த வசீகர ஒளியில் கரைந்தது.

"இந்த மழைத்துளிகள், நம் காதலைப் போலவே" என்றாள் அனுஷா. 

"எப்படி?" என்றான் அஸ்வின். 

" மண்ணோடு சேரும் இந்த மழைத்துளிகளைப் பிரிக்க முடியாது. அதுபோல  நம் காதலையும் யாரும் பிரிக்க முடியாது" என்றாள் அனுஷா.

 அஸ்வின், அனுஷாவை மெல்ல அணைத்துக் கொண்டான். மழைத்துளிகள், அவர்களின் இணைப்பை பலப்படுத்தின.

அந்த நொடி, அவர்கள் இருவரின் இதயத்துடிப்பும்  ஒன்றாக இணைந்தது.  மழையின் இசை, அவர்களின் காதலின் பாடலாக ஒலிக்கத் தொடங்கியது!

 .

மதுரை நூலக மர்மம்!-அத்தியாயம்-2 - மதிபாலன்

மதுரை நூலகத்தின் பழைய புத்தகங்களின் மணம் நிறைந்த விசாரணை அறையில், பழைய கடிகாரத்தின் டிக் டிக் சத்தம் மட்டுமே கேட்டுக் கொண்டிருந்தது. 

கூர்மையான கண்களுடன், மதுரை மாவட்ட குற்றப்பிரிவு இன்ஸ்பெக்டர் ஆர்யா, மூன்று சந்தேக நபர்களுக்கு எதிரில் அமர்ந்திருந்தார். 

தனது அனுபவம் மற்றும் புத்திக்கூர்மையால் இந்த மர்மத்தைத் தீர்க்க வேண்டும் என்ற உறுதியில் இருந்தார்.

முதலில் விசாரணைக்கு ஆளானவர் டாக்டர் குமார்.  முனைவர் பட்டம் பெற்றவர் என்றாலும், அவரது கண்களில் கவலை தெரிந்தது. 

"நீங்கள் இரவு முழுவதும் உங்கள் அலுவலகத்தில் இருந்ததாகச் சொன்னீர்கள், டாக்டர். ஆனால், பாதுகாப்பு கேமராக்கள் நீங்கள் வெளியே சென்றதையும் திரும்ப வந்ததையும் காட்டுகின்றன. விளக்கமளிக்க முடியுமா?" ஆர்யா கேட்டார், அவரது குரலில் ஒரு கட்டளையிடும் தொனி இருந்தது.

டாக்டர் குமார் திணறினார். "அது... சின்ன விஷயம் சார் , கொஞ்சம் ரிலாக்ஸ் பண்ணிக் கொள்ளலாம்  என்று போனேன் ," என்றார்.

ஆர்யா சிரித்தார், அது ஒரு கேலிக்குரிய சிரிப்பு. "நூலகத்தின் மறுமுனைக்கு போய் வருவது சின்ன விஷயமா ? நான் நம்பவில்லை, டாக்டர். நீங்கள் உண்மையில் என்ன செய்துகொண்டிருந்தீர்கள்?"

டாக்டர் குமாரின் முகத்தில் குற்ற உணர்வு மின்னியது. "நான் ஒரு விஷயத்தைத் தேடிக்கொண்டிருந்தேன்," என்று மெல்லிய குரலில் ஒப்புக்கொண்டார். "ஒரு புத்தகம், மிகவும் சிறப்பு வாய்ந்த புத்தகம்."

ஆர்யா தலையசைத்தார். "புத்தகமா? என்ன விதமான புத்தகம்?"

டாக்டர் குமார் தயங்கினார். "அது மிகுந்த சக்தி வாய்ந்த புத்தகம். உலகையே மாற்றக்கூடிய புத்தகம்."

ஆர்யா தனது குறிப்பேட்டில் ஏதோ எழுதினார். "அந்த புத்தகத்தின் ரகசியம் என்ன?"

டாக்டர் குமார் குரலைத் தாழ்த்தினார். "அது காக்கும் சக்தியையும் அழிக்கும் சக்தியையும் கொண்ட ரகசியம். ராகவன்,  அதைப் பற்றி பித்துப் பிடித்தவராக இருந்தார். அது பிரபஞ்சத்தின் மிகப்பெரிய மர்மங்களைத் திறக்கும் சாவி என்று நம்பினார்."

ஆர்யா தனது கண்களை இமைக்காமல் டாக்டர் குமாரைப் பார்த்தார். "அப்படியான சக்தி வாய்ந்த புத்தகம் சாதாரண நூலகத்தில் எப்படி வந்தது?"

டாக்டர் குமார் தோள்களை உயர்த்தினார். "ஒருவேளை அது பாதுகாப்பான இடம். அங்கு இருந்தால் தவறானவர்கள் கைகளுக்கு கிடைக்காது என்று நினைத்திருக்கலாம் ."

ஆர்யா தன் கவனத்தை மிஸ் லட்சுமி மீது திருப்பினாள். கண்களில் துயரம் தெரிந்த இளம் பெண். "மிஸ் லட்சுமி, நீங்கள் ராகவனுடன் நெருக்கமாக இருந்தீர்கள். அந்த புத்தகம் பற்றி உங்களுக்கு என்ன தெரியும்?"

மிஸ் லட்சுமி" ராகவன் அந்தப் புத்தகத்தை மிகவும் ரகசியமாக வைத்திருந்தார். அது உலகை அழிக்கக்கூடும் என்று அவர் பயந்தார்' என்றார். 

ஆர்யா "அப்படியென்றால், நீங்களும் அந்தப் புத்தகத்தைப் பற்றி பயப்படுகிறீர்களா? "என்று கேட்டார். 

மிஸ் லட்சுமி அதற்கு "ஆம்  , ஆனால் அதே நேரத்தில் அந்தப் புத்தகத்தில் என்ன இருக்கிறது என்று தெரிந்துகொள்ள ஆசையும் இருக்கிறது" என்றும் கூறினார்.

பின்னர் ஆர்யா திரு நாராயணனிடம் திரும்பினார். அவர் ஏற்கனவே சொன்னதை மீண்டும் கூறி, உண்மையைச் சொல்ல வேண்டும் என்று வலியுறுத்தினார். திரு நாராயணன் தனக்கு ஒன்றும் தெரியாது என்றே கூறினார்.

இந்த நேரத்தில், நூலகத்தின் பாதுகாப்பு அதிகாரி வந்து நூலகத்தின் பழைய பகுதியில் ஒரு கதவு திறந்திருப்பதைக் கண்டதாக கூறினார்.

 அனைவரும் அந்த இடத்திற்குச் சென்றனர். அந்த அறையில் பழைய புத்தகங்கள் நிறைந்த அலமாரிகள் இருந்தன. ஒரு அலமாரியின் பின்னால் ஒரு ரகசிய அறை இருந்தது. 

ஆர்யா அதைத் திறந்தார். உள்ளே ஒரு பெரிய மரப்பெட்டி இருந்தது. ஆனால் அது பூட்டப்பட்டிருந்தது.அந்தப் பூட்டைத் திறக்கும் சாவி யாரிடம் இருக்கிறது என்று ஆர்யா கேட்டார். 

அப்போது, அறைக்குள் ஒரு பெண் நுழைந்து "அந்தப் பெட்டியைத் திறக்க வேண்டாம் "என்று கூறினாள். அவள் கையில் ஒரு துப்பாக்கி இருந்தது. 

அவள் "அந்தப் புத்தகத்தை யாரும் கண்டுபிடிக்கக் கூடாது , அது உலகை அழிக்கும் " என்றாள்.

ஆர்யா அவளை அமைதியாக இருக்கும்படி சொல்லி, துப்பாக்கியை கீழே போடச் சொன்னார். ஆனால் அந்தப் பெண் மறுத்துவிட்டாள். ஆர்யா மெதுவாக அவளை நோக்கி நகர்ந்தார். அடுத்து என்ன நடக்கும் என்று அனைவரும் இதயமும் துடிக்கத் தொடங்கியது!

 . (அந்தப் பெண் யார்? அந்தப் புத்தகத்தின் ரகசியம் என்ன? ஆர்யா அந்தப் பெட்டியைத் திறக்க முடியுமா? இந்த கேள்விகளுக்கான பதில்களை அடுத்த அத்தியாயத்தில் காணலாம்.)

மிராக்கஸின் மௌன இசை - மதிபாலன்

கிரேக்கத்தின் சூரியனும் கடலும் சந்திக்கும் இடத்தில், மிராக்கஸ் என்ற மன்னனின் ஆட்சி செலுத்தும் அழகிய நகரம் ஒன்று இருந்தது. அதன் பெயர் மெலோடியா!

அந்த நகரம், மிராக்கஸின் காதலி இலாராவின் இசையால் எப்போதும் மகிழ்ச்சியாக இருக்கும். 

இலாராவின் வயலின் இசை, கடலின் அலைகளோடு கலந்து, காற்றில் பரவி, மக்களின் உள்ளங்களில் இன்பத்தை நிரப்பும்.

ஒரு பௌர்ணமி இரவில், அரண்மனையின் பின்புறம் அமைந்திருந்த ரோஜாத் தோட்டத்தில், இலாரா தன் வயலினை வாசித்துக்கொண்டிருந்தாள். மிராக்கஸ், அவள் கண்களில்  ஒளிர்ந்த காதல் இசையை ரசித்துக் கொண்டிருந்தான்.

"இலாரா, உன் இசை என்னை சொர்க்கத்திற்கு அழைத்துச் செல்கிறது," என்றான் மிராக்கஸ்.

"அது என் இதயத்தின் குரல், மிராக்கஸ்," என்று சொல்லி, இலாரா தன் இசையை தொடர்ந்தாள்.

ஆனால், அந்த இனிமையான தருணம் நீண்ட நேரம் நீடிக்கவில்லை. ஒரு கொடிய விஷநாகம் செடிகளின் நடுவில் இருந்து அவளை நோக்கி மெல்ல வந்தது. அதை யாரும் கவனிக்கவில்லை.

 இசை வெள்ளத்தைப் பாய்ச்சிக்கொண்டிருந்த இலாராவின் இடது பாதத்தில் தன் விஷப்பற்களை பதித்து ஓடி  மறைந்தது அது.

இலாரா அலறியபடி மிராக்கஸின் கைகளில் விழுந்தாள். மிராக்கஸ் திகைத்து நின்றான். அவன் மடியில் சரிந்த , இலாராவின் வாயில் நுரை தள்ளியது. கண்கள் மேலே செருகியது.

அவள் உயிர்   மெல்ல மெல்ல அவன் கண்ணெதிரிலேயே  பிரிவதைப் பார்த்த  மிராக்கஸ், அழுதான். அரற்றினான். பித்துப் பிடித்தவன் போலானான்.

இலாரா இல்லாத உலகம் மிராக்கஸுக்கு இருளாகத் தெரிந்தது. அவன் தன் அரண்மனையை விட்டு வெளியே வரவே இல்லை.

 நாள்கள் செல்லச் செல்ல, அவன் மனம் கடும் துயரில் மூழ்கியது.

ஒரு நாள், தன் மந்திரவாதியை அழைத்து, "இலாராவை மீண்டும் உயிர்ப்பிக்க முடியுமா?" என்று கேட்டான்.

மந்திரவாதி தலை அசைத்து, "இயற்கையின் விதியை மாற்ற முடியாது, மன்னா," என்றான்.

மிராக்கஸ், "அப்படியானால், இலாராவின் இசையை என்றென்றும் நினைவில் வைத்துக் கொள்ள என்ன செய்யலாம்?" என்று கேட்டான்.

மந்திரவாதி யோசித்து, "இலாராவின் வயலினில் ஒரு மந்திரத்தைச் செலுத்தலாம். அப்படிச் செய்தால், இந்த நாட்டில் யாரும் இசைக்கருவிகளை வாசிக்க முடியாது. ஆனால், இலாராவின் இசை எப்போதும் உங்கள் நினைவில் இருக்கும்," என்றான்.

மிராக்கஸ் உடனே சம்மதித்தான். மந்திரவாதி வயலினில் மந்திரத்தைச் செலுத்தினான். அன்றிலிருந்து, மெலோடியா நகரில் இசை என்ற ஒன்றே இல்லாமல் போனது.

ஆயிரம் ஆண்டுகள் கழித்து, அமரா என்ற ஒரு இளம் பெண், தன் பாட்டியின் பழைய வீட்டை சுத்தம் செய்து கொண்டிருந்தாள். 

தூசி படிந்த ஒரு  பெட்டியைத் திறந்தபோது, அதில் ஒரு பழைய வயலின் கிடந்தது. அவள் அதை எடுத்து, தன் விரல்களை தந்திகளில்  ஓடவிட்டாள். அந்த வயலின், மெல்லிய இசையை எழுப்பியது. அந்த இசை, அமராவின் இதயத்தைத் தொட்டது.

அமாராவின் வீட்டை சுற்றியிருந்த மக்கள், அந்த இசையைக் கேட்டு வியந்தனர். அவர்களின் மனதில், மறக்கப்பட்ட இசையின் நினைவுகள் மீண்டும் உயிர் கொண்டெழுந்தது .

அமராவின் இசை, மக்களின் இதயத்தை மயக்கும் ஆனந்த அலையாகப் பரவியது. 

மக்கள் தங்கள் வீடுகளில் பழைய இசைக் கருவிகளை தேடி எடுத்து வாசிக்கத் தொடங்கினர். மிராக்கஸின் மந்திரம் உடைந்தது.

  ஆயிரம் ஆண்டுகளுக்குப் பிறகு மீண்டும் மெலோடியா நகரத்தில்  இசையின் புதிய சகாப்தம் தொடங்கியிருந்தது!

 

பயத்தை வெல்வது எப்படி?- {பகுதி -4] - மதிபாலன்

மனித வாழ்க்கை என்பது பல்வேறு அனுபவங்களின் தொகுப்பு. இவற்றில் மிக முக்கியமானது நம்மைச் சுற்றியுள்ள உலகைப் பற்றிய புரிதல் மற்றும் அதற்கு ஏற்ப நம்மை மாற்றிக்கொள்ளும் திறன். 

ஆனால், இந்தப் பயணத்தில் நம்மைத் துன்புறுத்தும் பல பயங்கள் உள்ளன. அவற்றில் முக்கியமானவை அறிவு நிலை, உருவத் தோற்றம் மற்றும் ஆரோக்கியம் பற்றிய பயங்கள்தான்.

  இந்த பயங்கள் ஏன் எழுகின்றன மற்றும் அவற்றை எவ்வாறு கையாள்வது என்பது பற்றி விரிவாகப் பார்ப்போம்.

அறிவு நிலை பற்றிய பயம்

"அறிவுடையார் எல்லாம் உடையார்" என்கிறது திருக்குறள். 

தன்னிடத்தில் வேறு எதுவும் இல்லையென்றாலும் அறிவுடையவர் எல்லாவற்றையும் உடையவரே ஆவார் என்பது இதன் பொருள்.

எனவே, ஒவ்வொருவரும் தங்கள் அறிவு நிலை மற்றவர்களை விட சிறப்பாக இருக்க வேண்டும் என்று எண்ணுவது இயல்பு.

ஆனால், இந்த எண்ணம் நம்மை தொடர்ந்து கற்றுக் கொள்ளவும், மேம்படவும் தூண்டினாலும், அதிகப்படியான எதிர்பார்ப்பு நம்மை தாழ்வு மனப்பான்மைக்கு உள்ளாக்கும்.

 மற்றவர்களுடன் ஒப்பிட்டுப் பார்க்கும்போது, நமக்குத் தெரியாத விஷயங்கள் அதிகமாக இருப்பதாக உணர்ந்து நாம் மன உளைச்சலுக்கு ஆளாகிறோம்.

• காரணங்கள் :

• தவறான ஒப்பீடு: நாம் மற்றவர்கள் பெற்றுள்ள   வெற்றியை மட்டுமே பார்க்கிறோம்.அதற்காக அவர்கள் நிகழ்த்திய போராட்டங்கள் பற்றி நினைத்துப் பார்ப்பதில்லை.

•  அவர்கள் பெற்ற வெற்றியும் உயர்வும் ஒரு நாளில் வந்ததில்லை. பல ஆண்டுகளாக இரவு பகல் பாராமல் அவர்கள் செய்த முயற்சி மற்றும் தளராத உழைப்பு அவர்களை இந்த நிலைக்கு உயர்த்தி இருக்கிறது என்பதைப் புரிந்து கொள்ள வேண்டும்.

•  அவர்களின் வெற்றியை மட்டுமே பார்க்கும் நாம் அவர்கள் எத்தனை முறை முயற்சி செய்து எத்தனை தோல்விகளுக்குப் பிறகு இந்த வெற்றியைப் பெற்றார்கள் என்பதையும் மனதில் கொள்ள வேண்டும்.

• சமூக அழுத்தம்: சமூக வலைதளங்கள் மற்றும் ஊடகங்கள் மூலம் பரப்பப்படும் வெற்றிக் கதைகள், நம்மை தொடர்ந்து கவலைப்பட வைக்கிறது.

•  அவர்கள் இதையெல்லாம் சாதித்து விட்டார்கள் , அவர்கள் இந்தப் பதவியை பெற்று விட்டார்கள், அவர்களுக்கு வீடு,வாசல் என்று இத்தனை வசதிகள் வந்து விட்டது. ஆனால் நாம் இன்னும் அதையெல்லாம் அடையவில்லை என்று ஒப்பிட்டுப் பார்த்து நம்மை நாமே குறைத்து மதிப்பிடுகிறோம்.

•  அவர்களுக்கு இருந்த வாய்ப்பு,வசதி,முயற்சி, உழைப்பு மற்றும்  சூழ்நிலை எல்லாம் வெவ்வேறு என்பதை புரிந்து கொண்டால் இப்படி நாம் கவலைப்பட மாட்டோம்.

•  அது மட்டுமல்லாமல் வலைத்தளங்கள் மற்றும் சமூக ஊடகங்களில் காட்டப்படும் அவர்களின் தோற்றங்கள் எல்லாம் உண்மைதானா என்பதையும் ஆராய்ந்து அறிய வேண்டும்.

•  இவர்களில் பெரும்பாலானோர்   கௌரவத்திற்காக, மற்றவர்கள் தம்மைப் பாராட்ட வேண்டும் என்பதற்காக தங்களை போலியாக, பகட்டாகக் காண்பித்துக் கொள்பவர்கள்  என்னும் உண்மையையும் விளங்கிக் கொள்ள வேண்டும்.

• தன்னம்பிக்கை குறைவு: தன்னை நம்பும் திறன் இல்லாததால், மற்றவர்களின் கருத்துகளை அதிக முக்கியத்துவம் கொடுத்து விடுகிறோம். .              

• "ஞாலம்  கருதினும் கைகூடும்                     காலம் கருதி இடத்தாற் செயின்" என்கிறார் திருவள்ளுவர்.

• அதாவது இந்த உலகமே நமக்கு சொந்தமாக வேண்டும் என்று நினைத்தாலும் அது நடக்கும். 

• எப்படி என்றால் நாம் செய்ய வேண்டிய செயலை செய்ய வேண்டிய நேரத்தில்  செய்ய வேண்டிய இடத்தில் செய்ய வேண்டும். அப்படி செய்யும் போது உலகையே நம்மால் வெற்றி கொள்ள முடியும். 

• தீர்வுகள்:

• தொடர்ந்து கற்றுக் கொள்ளுதல்: புதிய விஷயங்களை நாம் தொடர்ந்து கற்றுக் கொள்ளும் போது, நம்முடைய அறிவு வளர்ச்சி அடையும். ஆழமான அறிவு நம் பிரச்சனைகளுக்கு   உரிய  தீர்வுகளைக் கண்டறிய உதவும்.

• தன்னம்பிக்கை அதிகரித்தல்: சிறிய வெற்றிகளை கொண்டாடி, தன்னைப் பாராட்டிக் கொள்ள வேண்டும். நான் அம்பானி ஆகித்தான் சந்தோஷப்படுவேன் என்றெல்லாம் சபதம் எடுத்துக் கொள்ளக் கூடாது.

•  கணிசமான  இயல்பான வெற்றியை, உயர்வை அடையும் போதெல்லாம் மகிழ்ச்சி கொள்ள வேண்டும். அப்போது தன்னம்பிக்கை அதிகரிக்கும்.

  

• ஒப்பீட்டை நிறுத்துதல்: மற்றவர்களுடன் ஒப்பிட்டுப் பார்க்காமல், தன்னைத் தானே மேம்படுத்திக் கொள்ள வேண்டும். அப்போது நம் வளர்ச்சியை நாம் கண்கூடாக பார்க்க முடியும்.

உருவத் தோற்றம் பற்றிய பயம்

தற்போதைய சமூகத்தில், உருவத் தோற்றம் மிகவும் முக்கியமானதாக கருதப்படுகிறது. இதனால், பலர் தங்களது உடல் எடை, உயரம், நிறம் போன்றவற்றைப் பற்றி கவலைப்படுகின்றனர். இது உடல் நலப் பிரச்சினைகளுக்கு வழிவகுக்கும்.

• காரணங்கள்:

• ஊடகங்களின் தாக்கம்: ஊடகங்களில் காட்டப்படும் அழகின் தரநிலைகள், நம்மை நாமாகவே ஏற்றுக் கொள்ள விடாமல் செய்கிறது.

•  வெள்ளையும் சிவப்பும் தான் கொள்ளை அழகென்று விளம்பரங்கள் சொல்வதை நாம் நம்பி விடுகிறோம். அவர்கள் வியாபாரத்தை அதிகரிக்கத்தான்  இப்படிச் செய்கிறார்கள் என்பதை நாம் உணர்வதில்லை.

•  உலக அழகி கிளியோபாட்ரா  கருப்புதான் என்பது எத்தனை பேருக்கு தெரியும்!

• சமூக அழுத்தம்: நண்பர்கள், குடும்பத்தினர், காதலன் அல்லது காதலி  நம்மைப் பற்றி என்ன நினைப்பார்கள் என்ற பயம் நம்மை உறங்கவிடாமல் செய்கின்றது.

•  உண்மையில் குறை இல்லாத மனிதர்கள் என்று உலகில் எவரும் இல்லை.

•  நீங்கள் அழகானவர் என்று நினைக்கின்ற ஒவ்வொருவரும் தங்களின் ஏதோ ஒரு குறையைப் பற்றி நினைத்துக் கொண்டுதான் இருப்பார்கள் என்பதைக் கருத்தில் கொள்ளவும்.

•  நிஜத்தில் அழகு என்பது நம் பார்வையில் இருக்கிறது. லைலாவின் அழகு மஜ்னுவின் கண்களில் இருக்கிறது. 

• "அழகானவர்களை எல்லாம் நமக்கு பிடிப்பதில்லை. நமக்கு பிடித்தவர்கள்தான் அழகாகி விடுகிறார்கள் " என்பதைப் புரிந்து கொள்ளுங்கள். 

• தன்னம்பிக்கை குறைவு: தன்னைப் பற்றி நேர்மறையான எண்ணம் இல்லாததால், மற்றவர்களின் கருத்துகளை அதிக முக்கியத்துவம் கொடுத்து விடுகிறோம்.

• தன்னை ஏற்றுக் கொள்ளுதல்: ஒவ்வொருவரும் தனித்துவமானவர்கள் என்பதை உணர்ந்து, நம்மை நாமாகவே ஏற்றுக் கொள்ள வேண்டும். அப்போது நம்மைப் பற்றிய தாழ்வு மனப்பான்மை நீங்கிவிடும்.

  

ஆரோக்கியம் மற்றும் நோய்வாய்ப்படுவது பற்றிய பயம்

நோய்வாய்ப்படுவது என்பது மனித வாழ்க்கையில் இயல்பான ஒன்று. ஆனால், நோய் பற்றிய பயம் நம்மை மன உளைச்சலுக்கு உள்ளாக்கும்.

• காரணங்கள்:

• அறியாமை: நோய்கள் பற்றிய தவறான தகவல்கள், நம்மை பயமுறுத்துகின்றன. நமக்கு இல்லாத நோய்கள் கூட நமக்கு இருக்கிறதோ என்னும் கற்பனை பயம் இதில் முக்கியமானது.

•  உதாரணமாக மருத்துவ ஆய்வில் ரத்த அழுத்தம் கூடுதல் என்று வந்தால் உடனடியாக நமக்கு மாரடைப்பு வந்துவிடும்  என்று பயப்படுவது.

• கட்டுப்பாடு இல்லாத பய உணர்வு:  ரத்தத்தில் சர்க்கரையின் அளவு அதிகமாகிவிட்டது என்று தெரிந்தால்  உடனடியாக சிறுநீரகம் பாதித்துவிடும். கால்களில் புண் வந்து அகற்ற வேண்டி வரும்  என்று பயந்து போவது. 

•  இவை எல்லா நேரங்களிலும் உண்மை இல்லை என்பதைப் புரிந்து கொள்வது நல்லது.

• தீர்வுகள்:

• சரியான தகவல்களைப் பெறுதல்: நோய்கள் பற்றிய சரியான தகவல்களை  மருத்துவரிடம் இருந்து பெற வேண்டும். சரியான தகவல்கள் நம்மை தேவையில்லாத பயங்களில் இருந்து விடுவிக்கும்.

• ஆரோக்கியமான வாழ்க்கை முறை: சரியான உணவு, உடற்பயிற்சி மற்றும் போதுமான தூக்கம் ஆகியவற்றின் மூலம் நோயைத் தடுக்கலாம்.

• மன அமைதி: யோகா, தியானம் போன்றவற்றின் மூலம் மனஅமைதியைப் பெறலாம். நிம்மதியான மனம் ஆரோக்கிய வாழ்வின் அடித்தளமாகிறது.

  அறிவு நிலை, உருவத் தோற்றம் மற்றும் ஆரோக்கியம் பற்றிய பயங்கள் நம் வாழ்க்கையை பாதிக்கின்றன என்பது உண்மைதான்.

ஆனால், இந்த பயங்களை வென்று நாம் மகிழ்ச்சியான வாழ்க்கையை வாழலாம்.  

 ஆரோக்கியமான வாழ்க்கை முறை மற்றும் நேர்மறையான எண்ணங்கள் ஆகியவை நம்மை வெற்றிக்கு இட்டுச் செல்லும்.

நம்பிக்கை கொண்ட மனம், எல்லாவற்றையும் சாதிக்கும்!

*************************************[பயத்தினால் ஏற்படும் பதற்றம், மனஅழுத்தம் மனச்சோர்வு ஆகியவற்றுக்கான தீர்வுகளை அடுத்த பகுதியில் பார்க்கலாம்...]

**************************************

மதுரை நூலக மர்மம்!(அத்தியாயம்-1)- மதிபாலன்

மதுரை நகரின் மையப்பகுதியில் அமைந்துள்ள பழமை வாய்ந்த நூலகத்தில், ஒவ்வொரு புத்தகமும் ஒரு கதை சொல்லும். ஆனால் இன்று, அந்த அமைதி சீர்குலைந்து கிடந்தது. 

புகழ்பெற்ற வரலாற்று ஆய்வாளர் ராகவன், தனது அலுவலகத்தில் கொடூரமாக கொல்லப்பட்டிருந்தார். அவரது மேசை, நூற்றாண்டுகளைத் தாண்டிய புத்தகங்களால் நிரம்பியிருந்தது. 

அந்தக் குழப்பத்தில், ஒரு பழைய கையெழுத்துப் பிரதியின் கிழிந்த பக்கம் மட்டும் தனித்து நின்றது.

 சூரிய ஒளி, நூலகத்தின் பழங்கால ஜன்னல்களின் வழியாக ஊடுருவி, தரையில் ரத்தக்கறைகளை பிரகாசிக்க வைத்தது. போலீஸ் இன்ஸ்பெக்டர் ஆர்யா, தன் மிடுக்கான யூனிஃபார்மில்   நூலகத்திற்குள் நுழைந்தார். 

அவரது கண்கள், ஒவ்வொரு மூலையையும் ஆராய்ந்தன. ராகவனின் அலுவலகம், ஒரு குற்றத்தின் களமாக மாறியிருந்தது.

"ராகவன்... ஒரு அமைதியான ஆய்வாளர். இவர் மீது யாருக்கு பகை?" ஆர்யா தனக்குத்தானே முணுமுணுத்தார்.

 தடயவியல் நிபுணர்  ரமேஷ் ரத்தக் கறைகளை ஆய்வு செய்து, " சார், ராகவன் கழுத்தை அறுத்து கொல்லப்பட்டிருக்கிறார். கொலை நடந்த நேரம் இரவு 12 மணிக்கு மேல் என்று நினைக்கிறேன்," என்றார்.

ஆர்யாவின் கண்கள், கிழிந்த கையெழுத்துப் பிரதியை நோக்கின. "இந்த பிரதி ரொம்ப முக்கியமானது போலிருக்கிறது," என்றார் அவர்.

 ஆர்யா, நூலகர் ராமச்சந்திரனிடம் விசாரிக்கத் தொடங்கினார். ராமச்சந்திரன்,   புத்தக அலமாரிக்குள்   மும்முரமாக  இருந்தார்.மிகவும் அமைதியானவராக காணப்பட்டார்.

"ராகவன் சார் ரொம்ப     மர்மமான மனிதர்  சார். அவர் எப்போதும் பழைய புத்தகங்களில் மூழ்கியிருப்பார். எப்போது வருவார் எப்போது போவார் என்பதை கூட சொல்ல முடியாது. சில சமயங்களில் இரவு முழுவதும் வேலை செய்வார்," என்றார் பதட்டமாக.

"அவர் யாரையாவது சந்தித்தாரா?" ஆர்யா கேட்டார்.

"சில சமயங்களில் வெளிநாட்டு ஆராய்ச்சியாளர்கள் வருவார்கள். அவர்களுடன் ரகசியமாக பேசுவார்," என்றார் ராமச்சந்திரன்.

"அந்த ஆராய்ச்சியாளர்களின் பெயர்கள் தெரியுமா?" ஆர்யா மீண்டும் கேட்டார்.

ராமச்சந்திரன் தலையை இடம் வலமாக  ஆட்டினார். "எனக்கு தெரியாது சார். ராகவன் சார் அதை ரகசியமாக வைத்திருப்பார்."

 ஆர்யா, தனது அலுவலகத்திற்கு திரும்பி வந்து, கிழிந்த பக்கத்தை ஆழ்ந்து ஆராய்ந்தார். 

அந்த நேரத்தில், அவரது கதவு சத்தமில்லாமல் திறந்தது. ஒரு மர்ம ஆசாமி , முகத்தை மறைத்துக்கொண்டு அறைக்குள் நுழைந்தான் .

"அந்த பிரதியை எனக்கு கொடுத்து விடுங்கள்," என்று  தன்  குரலை மாற்றி கேட்டான்.

ஆர்யா திடுக்கிட்டார். "நீங்கள் யார்?" என்று கேட்டார்.

"அதைப் பற்றி கவலைப்படாதீர்கள். பிரதியை கொடுத்து விடுங்கள்," என்று மர்ம ஆசாமி மீண்டும் குரலை உயர்த்தினான்..

ஆர்யா, திடீரென்று எழுந்து நின்று, அவனை நோக்கி ஓடினார். இருவரும் சண்டையிடத் தொடங்கினர்.

 அந்த சண்டையின்போது, மர்ம ஆசாமி  ஆர்யாவை தள்ளிவிட்டு, இருட்டில் மறைந்துவிட்டான்.

"இந்த வழக்கு நிச்சயம் எளிதானதல்ல," என்று ஆர்யா தனக்குத்தானே முணுமுணுத்தார்.

 [கிழிந்த பக்கத்தில் என்ன ரகசியம்? ராகவனின் கொலையாளியை பிடிக்க முடியுமா? இந்த கேள்விகளுக்கு பதில்கள், அடுத்த அத்தியாயத்தில்...]

மறுசுழற்சி: நம் பூமியின் எதிர்காலம்- மதிபாலன்

நாம் தினமும் பயன்படுத்தி தூக்கி எறியும் பழைய பொருட்கள், குறிப்பாக பிளாஸ்டிக் பைகள், காகிதம், கண்ணாடி, தகர டப்பாக்கள்  போன்றவை நம் சுற்றுச்சூழலுக்கு பெரும் அச்சுறுத்தலாக உள்ளன. 

இந்த கழிவுகள் நம் நிலம், நீர் மற்றும் காற்று ஆகியவற்றை மாசுபடுத்தி, பல்வேறு உயிரினங்களின் வாழ்வாதாரத்தை பாதிக்கின்றன. இந்த பிரச்சனைக்கு தீர்வு காணும் வழியாக மறுசுழற்சி முறை திகழ்கிறது.

மறுசுழற்சி என்றால் என்ன?

மறுசுழற்சி என்பது பயன்படுத்தப்பட்ட பொருட்களை மீண்டும் புதிய பொருட்களாக மாற்றுவதாகும். 

உதாரணமாக, ஒரு பிளாஸ்டிக் பாட்டிலை உருக்கி புதிய பிளாஸ்டிக் பொருள் தயாரிக்கலாம். இவ்வாறு செய்வதன் மூலம், நாம் புதிய பொருட்களை உற்பத்தி செய்ய தேவையான மூலப்பொருட்களை சேமிக்கலாம்.

ஏன் மறுசுழற்சி செய்ய வேண்டும்?

• பூமியை காப்பாற்ற: நாம் தூக்கி எறியும் குப்பைகள் நிலத்தில் புதைந்து, மண்ணையும் நீரையும் மாசுபடுத்துகின்றன. மறுசுழற்சி மூலம் குப்பைகளின் அளவைக் குறைத்து, பூமியை பாதுகாக்கலாம்.

• மரங்களை காப்பாற்ற: காகிதத்தை மறுசுழற்சி செய்வதன் மூலம், புதிய காகிதம் தயாரிக்க மரங்களை வெட்ட வேண்டிய அவசியம் குறையும்.

• 
  எரிபொருள் சேமிப்பு: புதிய பொருட்களை உற்பத்தி செய்ய குறைவான எரிபொருள் தேவைப்படும்.

• சுற்றுச்சூழல் பாதுகாப்பு: மறுசுழற்சி மூலம் காற்று மற்றும் நீர் மாசுபாடு குறையும்.

•  வளங்கள்  சேமிப்பு: இயற்கை வளங்கள் குறைந்து வருவதால், அவற்றை சேமிப்பது அவசியம்.

• பசுமை வீடு: மறுசுழற்சி செய்யும் பழக்கத்தை நம் வீட்டில் ஏற்படுத்துவதன் மூலம், நாம் ஒரு பசுமை வீட்டை உருவாக்கலாம்.

எப்படி மறுசுழற்சி செய்வது?

• குப்பைத் தொட்டியைப் பிரித்தல்: காகிதம், பிளாஸ்டிக், கண்ணாடி, உலோகம் என தனித்தனி குப்பைத் தொட்டிகளை வைத்து, குப்பைகளை வகைப்படுத்தி போட வேண்டும்.

• சுத்தமாக வைத்தல்: மறுசுழற்சி செய்யப்படும் பொருட்களை சுத்தமாக வைத்திருக்க வேண்டும். அப்போதுதான் அவை மறுசுழற்சிக்கு உகந்ததாக இருக்கும். 

• மறுசுழற்சி விதிகளை தெரிந்து கொள்ளுதல்: ஒவ்வொரு இடத்திலும் மறுசுழற்சி விதிகள் வேறுபடலாம். அந்த விதிகளை தெரிந்து கொள்வதன் மூலம் முறையான அதிகபட்ச மறுசுழற்சிக்கு உதவ முடியும்.

• மறுசுழற்சி மையங்களுக்கு கொண்டு செல்லுதல்: வீட்டில் சேகரிக்கப்பட்ட மறுசுழற்சி பொருட்களை அருகிலுள்ள மறுசுழற்சி மையங்களுக்கு கொண்டு செல்ல வேண்டும். இதனால் நம் வீடு மற்றும் சுற்றுப்புறம் தூய்மையாக நமக்கும் ஒரு வருமானம் கிடைக்க வாய்ப்பு உண்டாகும்.

  

மறுசுழற்சியின் நன்மைகள்

• பூமியின் ஆயுளை நீட்டித்தல்: மறுசுழற்சி மூலம் நாம் நம் பூமியின் ஆயுளை நீட்டிக்க முடியும்.

• பசுமைப் பொருளாதாரத்தை ஊக்குவித்தல்: மறுசுழற்சி மூலம் பசுமை பொருளாதாரத்தை ஊக்குவிக்கலாம்.  

• தொழில் வாய்ப்புகள்: மறுசுழற்சி துறையில் பல தொழில் வாய்ப்புகள் உள்ளன.

• சமூக பொறுப்பு: மறுசுழற்சி செய்வதன் மூலம் நாம் சமூக பொறுப்பை ஏற்றுக்கொள்கிறோம்.

 மறுசுழற்சி என்பது நம் அனைவரின் கடமை. நாம் அனைவரும் சேர்ந்து மறுசுழற்சி செய்யும் பழக்கத்தை ஏற்படுத்திக் கொண்டால், நம் பூமியை பாதுகாத்து, வருங்கால சந்ததியினருக்கு ஒரு சுத்தமான சூழலை உருவாக்கிக் கொடுக்கலாம்.

 

பயத்தை வெல்வது எப்படி? [பகுதி -3] - மதிபாலன்

காதல் வீரம் என்னும் இரண்டையும் இரு கண்களாக பார்ப்பது தமிழ் மரபு. இதில் வீரத்தின் அடிப்படை பயம் இல்லாமல் இருப்பது.

 கவிஞர் கண்ணதாசன் ஒரு பாடலில்,

 அச்சம் என்பது மடமையடா அஞ்சாமை திராவிடர் உடமையடா...!

என்று எழுதியிருப்பார்.

 அதில் தேசத்தை காப்பதற்கும் மானத்தை காப்பதற்கும் அச்சத்தை விட்டுப் போராடு என்று சொல்லி இருப்பார்.

 அஞ்சாமல் வாழ்வது திராவிடர் உரிமை மட்டுமல்ல. மனித குலத்தின் உரிமை என்பதை மறக்கக் கூடாது.

 

அச்சமில்லை!அச்சமில்லை!

பாரதியார் ஒரு பாடலில் எதற்கெல்லாம் அச்சமில்லை என்று ஒரு பட்டியல் போட்டிருப்பார்.

 அந்தப் பாடல் இப்படித் தொடங்கும் .

அச்சமில்லை அச்சமில்லை அச்சமென்பதில்லையே...

 உச்சி மீது வானிடிந்து வீழுகின்ற போதிலும் அச்சமில்லை அச்சமில்லை அச்சமென்பதில்லையே...

  இதில், வானம் இடிந்து தலை மேல் விழுந்தாலும், நண்பர்கள் விஷத்தை கொண்டு வந்து நம் வாயிலே ஊற்றினாலும், மிகவும் அழகு வாய்ந்த இளம் பெண்கள் நம் அருகில் வந்து மயக்க முயற்சித்தாலும் , இந்த பூமியில் உள்ள அனைவரும்   ஒன்றாய் சேர்ந்து வந்து நம்மை எதிர்த்தாலும் நமக்கு அச்சமில்லை என்று கூறி இருப்பார்.

 வாழ்க்கையில் என்ன நடந்தாலும் பரவாயில்லை அச்சம் இல்லாமல் இரு என்னும் உத்வேகம் இப்பாடலில் கிடைக்கும்.

பயமின்மை நல்லதா?

எதைக்கண்டும் பயப்படாமலேயே இருப்பது நல்லதா? அது அறிவார்ந்த செயலா? என்று கேட்டால் அதற்கு திருவள்ளுவர் பதில் சொல்கிறார்.

 அஞ்சுவது அஞ்சாமை பேதமை அஞ்சுவது 

அஞ்சல் அறிவார் தொழில்

 என்கிறார்.

இதன் பொருளைப் பார்ப்போம்.

 அறிவுடையவர்கள் ,பயப்பட வேண்டிய விஷயத்திற்கு பயப்படுவார்கள். அப்படி பயப்பட வேண்டிய விஷயத்திற்கும் பயப்படாமல் இருப்பது முட்டாள்தனம் என்கிறார்.

 அவரே எதற்கு பயப்பட வேண்டும் என்றால், தீய செயல்களை செய்வதற்கு பயப்பட வேண்டும். அதேபோல   பிறரிடம் யாசகம் கேட்பதற்கு பயப்பட வேண்டும் என்று கூறுகிறார்.

 ஏன் இந்த பயம்?

தீய செயல்களை செய்யும் போது நமது மனசாட்சி உறுத்தும். அப்போது பயம் ஏற்படும்.

 அப்படி ஒரு உறுத்தலே இல்லாமல் அல்லது அந்த உறுத்தலுக்கும் பயப்படாமல்    ஒரு தீமையை செய்து விட்டால்  அதன் விளைவுகள் கடுமையாக இருக்கும்.

 அதனால் எதிரிகள் உருவாகலாம். அவர்கள் தாக்க வரும்போது பயம் வரும்.

 அதேபோல பிறரிடம் கையேந்தும் போது  தன் நிலையை எண்ணி பயம் வரும். சரி. ஏன் அப்படி ஒரு நிலை ஏற்படுகிறது?

 தன்னிடம் வாழ்க்கை நடத்த பொருள் இல்லை வசதியில்லை. தான் அதை சம்பாதிக்கவும் முடியாது என்னும் நிலை வரும் போது யாசகம் கேட்பது நடக்கிறது. அப்படி யாசகம் கேட்பவர்கள் கூனிக் குறுகி அச்சப்படுவார்கள்.

   இந்த பயங்களை எப்படிப் போக்குவது?

வாழ்வில் நேர்மையான வழிகளை கடைப்பிடித்து  நன்மையை செய்யும் ஒருவனுக்கு பயம் இருக்காது. தைரியம் மேலோங்கி இருக்கும்.

 எனவே நல்லதை நினைத்து நல்லதையே செய்வது அச்சம் இல்லாமல் வாழும் ஒரு வழியாகும்.

தன்னுடைய உழைப்பில் வாழும் ஒருவன் யாசகம் கேட்கும் நிலை ஏற்படாது. அவன் சமூகத்தில் அச்சம் இல்லாமல் வாழலாம்!

சரி. நல்லவர்கள் மற்றும் உழைப்பவர்கள் அனைவரும் பயமின்றி வாழ முடியுமா?

வாழ்க்கையில் தவிர்க்க முடியாமல் வரும் இன்னும் சில பயங்களைப் பற்றி அடுத்த பகுதியில் பார்க்கலாம்!

 

 

பயத்தை வெல்வது எப்படி?- [பகுதி -1] - மதிபாலன்

நாம் அனைவரும் ஏதாவது ஒரு விஷயத்திற்கு பயப்படுவது இயல்புதான். 

இந்த பயம் நம்மை நிறைய விஷயங்களை செய்யவிடாமல்  தடுத்துவிடும். ஆனால், பயத்தை வெல்ல முடியும். எப்படி?

பயம் என்றால் என்ன?

பயம் என்பது நம் உடலின் ஒரு இயற்கையான எதிர்வினை.

 நமக்கு ஆபத்து இருக்கும்போது நம்மை காப்பாற்ற இந்த பயம் உதவுகிறது. ஆனால், எல்லா பயமும் நியாயமானதாக இருக்காது. சில அர்த்தமற்ற பயங்கள் நம்மை நிறைய கஷ்டப்படுத்தும்.

பயங்களின் வகைகள்

 * நியாயமான பயம்: உதாரணமாக, ஒரு உயரமான மரத்தில் ஏறுவது. பைக்,கார் ஓட்டப் பழகுவது போன்றவை. இவை ஆபத்தானது என்பதால் நமக்கு பயமாக இருப்பது இயல்பு.

 * அறியா பயம்: உதாரணமாக, பூச்சிகள் என்றால் பலருக்கு பயமாக இருக்கும். உதாரணமாக தேள், பூரான் போன்றவற்றை பார்த்து ஏற்படும் பயம்.ஆனால், எல்லா பூச்சிகளும் நம்மை கடிக்காது. என்றாலும் பயமாக இருக்கும். உதாரணமாக கரப்பான் பூச்சியை பார்த்து பயந்து ஓடுவோம்.

 * சமூக பயம்: கூட்டத்தில் பேசுவது, புதிய நண்பர்களை உருவாக்குவது போன்றவை. இதுபோன்ற இடங்களில் நம்மைப் பற்றிய மற்றவர்களின்  மதிப்பீடு  எப்படி இருக்கும் என்று பயம் தோன்றும்.

 * தனிமை பயம்: தனியாக இருப்பது, புதிய இடங்களுக்குச் செல்வது போன்றவை.இவற்றில் ஏதாவது பிரச்சனை ஏற்படும் போது நமக்கு உதவுவதற்கு ஆள் இல்லையே என்கிற கவலை பயத்தைக் கொடுக்கும்.

பயத்திற்கு காரணங்கள்

 * கடந்த கால அனுபவங்கள்: ஏற்கனவே நேர்ந்த கெட்ட அனுபவங்கள் காரணமாக பயம் ஏற்படலாம். ஏற்கனவே சிலவற்றை செய்யப்போய் அவற்றின் எதிர்மறை விளைவுகள்பயத்தை உருவாக்கலாம்.

 * தவறான நம்பிக்கைகள்: நம்மால் இதை செய்ய முடியாது என்று நாம் நினைத்துக்கொள்வது மிக முக்கியமான பயமாகும். 

முயற்சி செய்தால் அது சுலபமாக கூட இருக்கும். ஆனால் பயத்தின் காரணமாக செய்யாமல் இருப்போம்.

 * பிறரின் எதிர்மறை கருத்துக்கள்: நம்மைச் சுற்றியுள்ளவர்கள் நம்மைப் பற்றி சொல்லும் எதிர்மறை கருத்துக்கள் நம் செயல்பாட்டை பாதிக்கும். 

இதை செய்யப் போகிறாயா? உன்னால் முடியுமா? என்று அவர்கள் ஒரு கேள்வி கேட்டாலே நம்பிக்கை போய்விடும். பிறகு அந்தச் செயலை செய்ய மனம் துணியாது !

 

பயத்தை வெல்வது எப்படி?

 * பயத்தை அடையாளம் காணுங்கள்: 

உங்களுக்கு என்ன பயமாக இருக்கிறது என்பதை முதலில் தெரிந்து கொள்ளுங்கள். எது பயமுறுத்துகிறது என்பது தெரிந்து விட்டால் அதை சமாளிப்பதும் எளிதாகிவிடும்.

 * பயத்தின் காரணத்தை யோசியுங்கள் : உங்களுக்கு ஏன் இந்த பயம் ஏற்படுகிறது என்று யோசித்துப் பாருங்கள். உதாரணமாக கிணற்றைப் பார்த்தால் பயமாக இருக்கிறது. காரணம் உங்களுக்கு நீச்சல் தெரியாது. எனவே உங்களுக்குத் தெரியாதது எல்லாம் ஏதோ ஒரு வகையில் பயத்தை விதைக்கும்.

 * பயத்தை எதிர்கொள்ளுங்கள்: உங்களுக்கு பயமாக இருக்கும் விஷயத்தை சிறிது சிறிதாக எதிர்கொள்ளுங்கள். அதை தைரியமாக செய்ய ஆரம்பியுங்கள். நீங்கள் நினைத்த அளவுக்கு அது மோசம் இல்லை என்று  தெரியவரும்.

 * நேர்மறையாக சிந்தியுங்கள்: உங்களால் முடியும் என்று சொல்லிக் கொள்ளுங்கள். 

"எண்ணிய எண்ணியாங்கு எய்துப - எண்ணியார் 

திண்ணியர் ஆகப் பெறின்" என்கிறார் திருவள்ளுவர். 

மனதில் உறுதியாக,ஒன்றை செய்ய வேண்டும் என்று முடிவு செய்து விட்டால் ,அது நிச்சயம் நடந்தேறும் என்பது அதன் பொருள்.

 நம்பிக்கை வந்துவிட்டால்  எவரெஸ்ட்டில் கூட ஏறிவிடலாம்.

 

 * உதவி கேளுங்கள்: 

உங்களால் தனியாக எதிர்கொள்ள முடியாத விஷயங்களில், உங்களுக்கு நம்பிக்கை உள்ள நண்பர்கள் அல்லது பெரியவர்களிடம் உதவி கேளுங்கள். அவர்களின் ஆலோசனைப்படி செயல்படும் போது தைரியம் வரும்.

 * தியானம் செய்யுங்கள்: குழப்பமான மன நிலையில் எதையும் செய்வது கடினமாக இருக்கும். 

மனதில் தெளிவிருந்தால் பிரச்சனைகளை சரியாக புரிந்து கொள்ள முடியும். பிரச்சனை புரிந்தால் தீர்வும் எளிதாகும்.

 தியானம் செய்வது மனதை அமைதிப்படுத்தி பயத்தை குறைக்க உதவும்.

 * உடற்பயிற்சி செய்யுங்கள்: உடற்பயிற்சி செய்வது மன அழுத்தத்தை குறைத்து நேர்மறையான எண்ணங்களைத் தரும்.

 நாம் ஆரோக்கியமாக இருக்கிறோம், பலமாக இருக்கிறோம் என்பதை உடற்பயிற்சி உறுதி செய்யும். எதையும் செய்ய முடியும் என்னும் நம்பிக்கை வரும்.

 * புதிய விஷயங்களை கற்றுக்கொள்ளுங்கள்: புதிய விஷயங்களை கற்றுக்கொள்வது நம்மை நம்பிக்கையுடன் இருக்க வைக்கும். 

எப்போதும் புதிய ஒன்றை  கற்றுக் கொள்ளும் போது  நாம் உயிர்ப்புடன் இருப்போம். மனம் நிறைவாக இருக்கும்.

நமது பல பயங்கள் அறியாமையால் ஏற்படுவதுதான். ஒரு விஷயத்தை நாம் நன்கு தெரிந்து கொண்டு விட்டால் அதைப் பற்றிய பயம் போய்விடும்.  

 * நன்றியுடன் இருங்கள்: உங்களிடம் இருக்கும் நல்ல விஷயங்களுக்கு நன்றியுடன் இருங்கள்.

கடவுள் நம்பிக்கை இருந்தால் அவருக்கு நன்றி சொல்லுங்கள் அல்லது இயற்கைக்கு நன்றி செலுத்துங்கள்.. 

"உனக்கும் கீழே உள்ளவர் கோடி... 

நினைத்துப் பார்த்து நிம்மதி நாடு!" - என்ற கண்ணதாசன் பாடலை எண்ணிக் கொள்ளுங்கள்.

 * சிரித்து மகிழுங்கள்: நகைச்சுவை உணர்வு பயத்தை குறைக்க உதவும்.

 

"இடுக்கண் வருங்கால் நகுக" என்கிறார் திருவள்ளுவர். நகைச்சுவை உணர்வு உள்ளவர்கள் துன்பம் வரும்போதும் எளிதாக எடுத்துக்கொள்வார்கள்.

 பயத்தை வெல்ல உதவும் சில பயிற்சிகள் 

 * டைரி எழுதுதல்:  உங்கள் பயம் பற்றி டைரியில்  எழுதுங்கள். எழுத எழுத பாரம்  குறைவது தெரியும்.  இது உங்கள் மனதைத் தெளிவுபடுத்த உதவும்.

 * மன வரைபடம்: உங்கள் பயத்தை ஒரு மரம் போல வரைந்து அதன் கிளைகளில் உங்கள் பயத்திற்கு காரணமான விஷயங்களை எழுதுங்கள்.

 இப்போது பயத்தைப் பற்றிய தெளிவான விவரம் உங்களுக்கு தெரிய வரும். பிரச்சனையின் பரிமாணத்தை உணர இது வாய்ப்பாக அமையும்.

 * ஆழமான சுவாசம்: ஆழமாக சுவாசிப்பது அல்லது மூச்சுப் பயிற்சி செய்வது, மனதை அமைதிப்படுத்த உதவும். 

நீங்கள் மூச்சை உள்ளிழுத்து  நிறுத்தும் போது, எண்ணங்களின் தீவிரம் குறையும்.  பயமான எண்ணங்களின் தாக்கமும் அதிகம் இருக்காது. 

 * தொடர்பு கொள்ளுங்கள்: உங்கள் பயம் பற்றி நெருங்கிய    நண்பர் அல்லது குடும்பத்தினரிடம் பேசுங்கள்.

 அவர்களிடம் உங்கள் பயத்தை பகிர்ந்து கொள்ளும் போது பதற்றம் குறைய வாய்ப்பு ஏற்படும். அவர்கள் உதவிக்கு வரும் வாய்ப்பு இருந்தால் பயம் மேலும் குறையும்.

 எனவே நண்பர்களே!

 பயம் என்பது இயல்பானது. ஆனால், அது நம் வாழ்க்கையை கட்டுப்படுத்த அனுமதிக்கக் கூடாது. சிறிது முயற்சி இருந்தால் நாம் எந்தவித  பயத்தையும் வெல்ல முடியும்.

நினைவில் கொள்ளுங்கள்:   பலருக்கும் இதே போன்ற பயங்கள் இருக்கும். பயத்தை வெல்ல நீங்கள் முயற்சி செய்யும்போது  பலரும் உங்கள் உதவிக்கு வருவார்கள்.

 ஆம்.  நம்புங்கள்!

பயத்தை வெல்ல

உங்களால் முடியும்!

 

ஐடியா வாங்கலையோ... ஐடியா!-மதிபாலன்

நீங்க புது யோசனைகள் தேடுறீங்களா?

 பயப்படாதீங்க!

நம்ம எல்லாருக்கும் ஒரு கட்டத்துல புது யோசனைகள் தீர்ந்து போயிருக்கும். அப்படி நாம திணறிகிட்டு  இருக்கும்போது, நம் மூளையை கொஞ்சம் வேற மாதிரி யோசிக்க வைக்கணும்.

 அப்படிப்பட்ட சமயத்துல உதவும் சில சுவாரசியமான வழிகள் இங்கே இருக்கு.

# தலைகீழா யோசிக்கலாம்:

ஒரு பிரச்சனைக்கு தீர்வு காணணும்னு நினைக்கும்போது, நம்மளுக்கு வழக்கமா தோணும் யோசனைகளை விட்டுட்டு, கொஞ்சம் வித்தியாசமா யோசிக்க ஆரம்பிச்சா, நமக்கு புதுப்புது யோசனைகள் தோன்றும்.

 உதாரணமா, ஒரு கடைக்குப் போனா, அங்கே எல்லா பொருளும் ஒரே மாதிரியா இருக்குன்னு நினைப்போம்.

 ஆனா, அந்தப் பொருள்களை வேறொரு விதமா பயன்படுத்தலாமா? அப்படின்னு யோசிக்க ஆரம்பிச்சா, நமக்கு நிறைய புது யோசனைகள் தோன்றும்.

# 30 வட்டங்கள் வரைந்து விளையாடுவோம்:

ஒரு காகிதத்துல 30 வட்டங்கள் வரைந்து, அந்த வட்டங்களை வெவ்வேறான பொருளா மாத்திப் பாருங்க. 

உதாரணமா, ஒரு வட்டத்தை சூரியன், இன்னொரு வட்டத்தை பூமி, அப்புறம் ஒரு வட்டத்தை பூனைனு மாத்திப் பாருங்க.

 இப்படி செய்யும் போது நம்மளோட கற்பனை திறன் அதிகமாகும்.

# மனப்படம் வரைந்து பாருங்க:

ஒரு மைய யோசனையை எடுத்துக்கிட்டு, அதைச் சுத்தி வேற வேற யோசனைகளை எழுதிப் பாருங்க. 

இது ஒரு மரம் வளர்ந்து கிளைகள் பரப்புவது  மாதிரி. உதாரணமா, நீங்க ஒரு புது கதை எழுதணும்னு நினைச்சா, ‘கதை’ன்னு ஒரு வட்டம் வரைந்து, அதுக்குள்ள ‘கதாபாத்திரம்’, ‘கதைக்களம்’, ‘கதைப்பாணி’னு வேற வேற கிளைகள் போட்டு எழுதி பாருங்க.

 # சும்மா ஒரு வார்த்தையை எடுத்துக்கிட்டு அதை உங்க யோசனையோட இணைச்சு பாருங்க:

  நீங்க ஒரு புது விளையாட்டு கண்டுபிடிக்கணும்னு நினைக்கும்போது, சும்மா ஒரு வார்த்தையை எடுத்துக்கிட்டு, அந்த வார்த்தையை அந்த விளையாட்டுல எப்படி பயன்படுத்தலாம்னு யோசிச்சுப் பாருங்க. 

உதாரணமா, ‘ ஊஞ்சல்l’னு ஒரு வார்த்தையை எடுத்துக்கிட்டு, ஊஞ்சல வச்சி ஒரு விளையாட்டு கண்டுபிடிக்கலாம்.

# புது இடத்துக்கு போய் வேலை செய்யுங்க:

நீங்க எப்பவும் யோசிக்கிற இடத்துல இருந்து கொஞ்சம் மாறி, ஒரு காபி ஷாப்ல அல்லது பூங்கால போய் உக்காந்து யோசிங்க. ஏன்னா, புது இடம் புது யோசனைகளைத் தரும்.

# உங்க யோசனையை மாத்தி மாத்தி பாருங்க:

உங்க யோசனையில ஏதாவது ஒரு பொருளை மாத்திப் பாருங்க, அல்லது இரண்டு யோசனைகளை ஒண்ணா இணைச்சுப் பாருங்க.

 உதாரணமா, நீங்க ஒரு புது குருமா செய்யணும்னு நினைச்சா, குருமாவுல  வழக்கமா போடும் பொருள்களை மாத்தி மாத்திப் பாருங்க. புதுசா ஒரு ரெசிபி கிடைக்கும் இல்லையா!

# உங்களுக்கு ஒரு கட்டுப்பாடு வச்சுக்கோங்க :

உதாரணமா, நீங்க ஒரு கதை எழுதணும்னா, எந்த ஒரு வார்த்தையும் மறுபடியும் வரக்கூடாதுன்னு  ஒரு கட்டுப்பாடு போட்டுக்கோங்க. 

இப்படி செய்யும்போது உங்க கற்பனைத் திறன் அதிகமாகும்.

# கண்ணை மூடி கனவு காணுங்க: சுத்தி இருக்கிற எல்லாத்தையும் மறந்துட்டு 

கண்களை மூடிட்டு, நீங்க  யோசிச்சுப் பாருங்க. 

அப்படி செய்யும்போது, உங்களுக்கு நிறைய புது யோசனைகள் வரும். ஆனால் இதை வண்டி ஓட்டும்போது செஞ்சிடாதீங்க!

இந்த டிப்ஸ்களை பின்பற்றிப்  பாருங்க. யாருக்கும் தெரியாத புது விஷயத்தை கண்டுபிடிக்கலாம்!

 

இப்போ, போங்க... உங்க கற்பனை குதிரையை தட்டி விடுங்க!